کراچی میں پی ایس ایل ٹرافی کی رونمائی


پاکستان سپر لیگ کے سیزن فائیو کے لیے ٹرافی کی رُونمائی کر دی گئی۔ اس حوالے سے کراچی کے نیشنل کرکٹ اسٹیڈیم میں تقریب کا اہتمام کیا گیا۔ اسکواش کے سابق کھلاڑی جہانگیر خان نے کپتانوں کے ہمراہ تقریب رُونمائی میں شرکت کی۔

ایسا پہلی بار ہوا کہ پی ایس ایل ٹرافی کی تقریب رُونمائی پاکستان میں ہوئی ہے۔ اس سے قبل چاروں سیزنز کی افتتاحی تقریب متحدہ عرب امارات میں ہوتی رہی ہے۔

علاوہ ازیں پی ایس ایل فرنچائز کوئٹہ گلیڈی ایٹرز اور اسلام آباد یونائیٹڈ کے کپتانوں سرفراز احمد اور شاداب خان نے پریس کانفرنس کی۔

خیال رہے کہ سیزن کا پہلا میچ جمعرات کو کوئٹہ اور اسلام آباد کے درمیان کھیلا جائے گا۔

سرفراز احمد نے کہا کہ اعزاز کے دفاع کے لیے اُن پر دباؤ تو ضرور ہے، تاہم وہ اچھی کارکردگی دکھا کر قومی ٹیم میں بھی جگہ بنانا چاہتے ہیں۔

سرفراز احمد کے بقول غیر ملکی کھلاڑیوں کی پاکستان سے متعلق رائے تبدیل ہو رہی ہے۔ شین واٹسن کو گزشتہ سال پاکستان میں کھیلنے کے لیے قائل کیا گیا، اب وہ خود پاکستان آ رہے ہیں۔

اُنہوں نے کہا کہ ویون رچرڈز کی ڈریسنگ روم میں موجودگی کا کھلاڑیوں کو بہت فائدہ ہوتا ہے جب کہ شین واٹسن کے تجربے سے نوجوان کھلاڑی استفادہ کرتے ہیں۔

اسلام آباد یونائیٹڈ کے کپتان شاداب خان نے کہا کہ پی ایس ایل میں ٹیم کی کپتانی اُن کے لیے اعزاز کی بات ہے۔ کوشش کروں گا کہ اچھی کارکردگی دکھا کر اپنا انتخاب درست ثابت کروں۔

شاداب خان نے کہا کہ فاسٹ بولر ڈیل اسٹین پہلے تین میچز کے لیے دستیاب نہیں ہوں گے۔

پاکستان سپر لیگ کے تمام میچز 20 فروری سے 22 مارچ تک پاکستان کے 4 شہروں کراچی، لاہور، ملتان اور راولپنڈی میں کھیلے جائیں گے۔

ایونٹ میں کل چھ ٹیمیں حصہ لیں گی جن میں اسلام آباد یونائیٹڈ، کوئٹہ گلیڈی ایٹرز، پشاور زلمی، لاہور قلندرز، کراچی کنگز اور ملتان سلطانز شامل ہیں۔

افتتاحی میچ کراچی کے نیشنل اسٹیڈیم میں جب کہ فائنل لاہور کے قذافی اسٹیڈیم میں کھیلا جائے گا۔

اس بارے میں admin

یہ بھی دیکھیں

ون ڈے رینکنگ، بابر ٹاپ 3 بلے بازوں میں شامل

انٹرنیشنل کرکٹ کونسل (آئی سی سی) کی جاری کردہ نئی ون ڈے رینکنگ میں بلے …

Leave a Reply

Your email address will not be published. Required fields are marked *